Bi schlächtem Wätter si mer am 6. Mai mit 7 Chinder, 5 Guides eire Ufsichtsperson und zwöi nöigierige Meitschi richtig Hingerwiisestei gfahre.
Ir Umkleidi vom Restaurant hei mer üsi Rucksäck packt und hei üs dure Waud ufe Wäg zum Igang vom Nidleloch gmacht.
Nach liechtem Abseile ar Chetti und steilem Istig heis aui id Dunkelheit vor Höhli gschafft.
D Martina hed gäng chli öbis zu de „Spots“ ir Höhli verzöut und so si mer gmeinsam bis zur ängste Stöu vor Höhli kraxlet.
Rucksack vorus und Chopfvora hei mer mega cooli Föteli gmacht.
Bim Zvieri isch „liechterlösche“ und „stüusi“ agseit gsi - stockfiischter und muxmüüslistill ischs auso scho chli gfürchig i däm Loch.
Wo d Lampe wider a si, hed me wider zfridni Ching und Betreuer gseh.
Leider hei mer üs de scho wider ufe Rückwäg müesse mache.
Schritt für Schritt, Stei für Stei 57 Höhemeter und gueti 203 Meter bis mer wider bim Igangsgitter gsi si.
Dört hei üs scho üsi Ufsichtsfraue in Empfang gno.
So hei mer e super coole JuFaSu Nomi im Nidleloch chönne gniesse und hei aui Ching wider glücklech, unverletzt und vorauem sehr dräckig wider usebrocht.

Artikel versenden06.05.2026

Weitere Artikel anzeigen Archiv anzeigen